«Нефтчи»нинг чемпионлик йўлидаги муваффақиятига муносиб ҳисса қўшган тажрибали футболчилар билан шартнома узайтирилди.

Ҳимоячи Фарруҳ Сайфиев янги мавсумда ҳам «Нефтчи» сафида ҳаракат қилишда давом этади. Клуб ва футболчи ўртасидаги шартнома яна бир йилга узайтирилди.

Ўзбекистон миллий терма жамоаси аъзоси бўлган Фарруҳ Сайфиев жорий мавсумда жамоамиз либосида 19 та учрашувда майдонга тушди. Ушбу ўйинларнинг 13 таси ғалаба билан якунланган бўлиб, футболчи Суперлига баҳсларида жами 1406 дақиқа ҳаракат қилди.

Шунингдек, 2025 йилги мавсумда ёрқин ўйин намойиш этган ярим ҳимоячи Икром Алибоев "Нефтчи" билан икки йиллик битимга имзо чекди.

Икром Алибоев ушбу мавсумда жамоа таркибида 28 учрашувда майдонга тушиб, жами 2253 дақиқа ҳаракат қилган. Ўзининг барқарор ўйини билан у ЎзПФЛ томонидан йил рамзий терма жамоасига киритилган.

Бундан ташқари, тажрибали ҳимоячи Муҳсин Убайдуллаев навбатдаги икки мавсумда Фарғонада ўтказадиган бўлди.

Муҳсин Убайдуллаев ушбу мавсумда Суперлига доирасида 27 учрашувда майдонга тушиб, жами 2387 дақиқа ҳаракат қилган.