"Манчестер Сити" бош мураббийи Хосеп Гвардиола жамоа мавсум давомида "ўйнашни ўрганганини" тан олди.

"Шаҳарликлар" ажойиб ғалабали серия қайд этмоқда ва ҳозирда Премьер-лига турнир жадвалида пешқадамлик қилаётган "Арсенал"дан атиги икки очко ортда қолмоқда. Август ойи охирида Гвардиола жамоаси "Брайтон"га мағлуб бўлганди (1:2). Испаниялик бу ўйинни матбуот анжуманида журналистлар билан суҳбатда ёдга олди.

"Ўшанда биз ҳали янги ўйинчиларимизни билмасдик, қандай ўйнашни билмасдик. Баъзида кутиш, футболчилар билан гаплашиш, вазиятни яхшироқ тушуниш керак бўлади. Мураббийлар сеҳргар эмас. Ҳаммаси дарҳол ўз ўрнига тушиши учун "биз буни қиламиз" дейишнинг ўзи етарли эмас," - дея мураббийнинг сўзларини келтиради Hayters TV.