"Вест Хэм" "Вулверхэмптон" сафида тўп тепаётган норвегиялик форвард Йорген Странн Ларсен хизматига қизиқиш билдирмоқда. Бу ҳақда The Guardian хабар берди.

Жамоаси қуйи лигага тушиб кетиш хавфи остида турган "болғачилар" устози Нуну Эшпириту Санту январь ойидаги трансферлар ойнасида ҳужумни кучайтирмоқчи ва Ларсенни асосий нишон сифатида белгилаб олган. "Вулверхэмптон" унинг учун 45,6 миллион евро олмоқчи.

Ларсен билан бир қаторда, Чехиянинг "Виктория" жамоаси вакили Рафиу Дуросимби каби бошқа вариантлар ҳам кўриб чиқилди. "Вест Хэм" сўралаётган суммани тўлашга тайёрми ёки йўқми, ҳозирча номаълум.

Жорий мавсумда 25 ёшли футболчи клуб миқёсида 18 та ўйинда 3 та гол урди. Унинг клуби 2 очко билан АПЛ турнир жадвалида сўнгги 20-ўринда бормоқда. "Вест Хэм" ҳисобида 13 очко бор ва жамоа ўн саккизинчи ўринда.