«Андижон» матбуот хизмати томонидан мухлислар ўртасида анъанавий тарзда йилнинг энг яхши футболчисини аниқлаш учун ўтказилган бу йилги сўровнома якунланди.
Икки босқичда ўтказилган сўровноманинг ҳал қилувчи қисмида Эржан Токотаев, Муҳаммадкарим Тойиров, Шаҳзод Азмиддинов ва Исмоил Акинаде номзодлари иштирок этди.
Энг кўп овоз тўплаган қирғизистонлик дарвозабон Эржан Токотаев 2025 йилда «Андижон»нинг энг яхши футболчиси номига сазовор бўлди.
У яқинда Қирғизистонда ҳам йилнинг энг яхши футболчиси деб топилган эди.
Сўровнома якунларига кўра, иккинчи ўрин Муҳаммадкарим Тойировга, учинчи ўрин эса Шаҳзод Азмиддиновга насиб қилди.
Токотаев иккинчи даврада «Андижон» сафига қўшилган бўлиб, Суперлигада 12 та, ОЧЛ–2 мусобақасида эса 4 та ўйин ўтказди. Эржан чемпионатда икки ўйинда дарвозасини дахлсиз сақлаган бўлса, ОЧЛ–2 да ўзи иштирок этган барча учрашувларда «қуруқ» ўйин ўтказишга муваффақ бўлди.
Эслатиб ўтамиз, ўтган йили энг яхши футболчи номига Бектемир Абдуманнонов сазовор бўлган эди.













