Кеча Ёзёвон туманидаги марказий стадионда Ёшлар лигаси 14-туридан ўрин олган  “Нефтчи” - “Шўртан” жамоалари ўринбосарлари ўртасида ўйин бўлиб ўтди.  Учрашувда  1:0 ҳисоби қайд этилди.

Биринчи таймда мезбонларда икки марта ҳисобни очиш учун қулай имконият вужудга келганди. Аммо ҳар икки саафр омад меҳмонлар томонида бўлди. Аввалига Отабек Ҳайдаров дарвозабон билан бирга-бир вазиятга чиқиб бориб берган зарбаси дарвоза устунига тегиб, майдон ташқарисига чиқиб кетди. Кейин эса Умид Қодировнинг зарбасини “Шўртан” ҳимоячиси дарвоза чизиғидан қайтариб қолди. Тайм охирида меҳмонларда ҳам гол киритиш имконияти бўлди. Лекин дастлабки 45 дақиқада ҳисоб очилмади.

Иккинчи таймда ҳужумга зўр берган мезбонлар 58-дақиқада ҳисобни очишди. Иззат Ғаниев томонидан оширган тўпни Отабек Зокиров боши билан дарвозага аниқ йўллади. Қолган дақиқаларда фарғоналиклар бир қатор имкониятлардан фойдалана олишмади.

Шундай қилиб, "Нефтчи" ўринбосарлари оғир кечган ўйинда навбатдаги уч очкони қўлга киритишди.