«Манчестер Юнайтед» раҳбарияти бош мураббий Рубен Аморим фаолиятидан норози бўлиб, унга нисбатан сабр-тоқатни йўқота бошлади. «Қизил иблислар» раҳбарларини португалиялик мутахассис қўллаётган ўйин тизими қониқтирмаяпти — жамоа рақиб дарвозаси олдида кам имкониятлар яратаяпти ва Чемпионлар лигаси зонасидан тобора узоқлашиб бормоқда. Бу ҳақда Caught Offside хабар бермоқда.
Манба маълумотларига кўра, манкунианлар Аморим ўрнига эҳтимолий мураббий режасини ишлаб чиқишни бошлашган. «Манчестер Юнайтед» бош мураббийи лавозимига номзодлар қаторида Оливер Гласнер («Кристал Пэлас»), Андони Ираола («Борнмут») ҳамда Хави (собиқ «Барселона» мураббийи) тилга олинмоқда.
Англия чемпионатининг 19 туридан кейин «қизил иблислар» 30 очко тўплаб, турнир жадвалида 6-ўринни эгаллаб турибди.













