"Барселона" ҳужумчиси Роберт Левандовски фаолиятини якунлаш эҳтимолига муносабати ҳақида гапирди.
Польшалик ҳужумчининг сўзларига кўра, у бу лаҳзадан қўрқмаяпти ва аллақачон футболдан кейинги ҳаёт ҳақида ўйламоқда.
«Фаолиятимни якунлашдан қўрқмайман, чунки бунга тайёргарликни бошлаяпман. Футбол ҳаётимнинг жуда муҳим қисми, лекин бу менинг бутун ҳаётим эмас. Агар бир кун келиб танам ўзгарганини ҳис қилсам, фаолиятимни якунлашга тайёр бўламан», - дея футболчининг сўзларини келтиради Mundo Deportivo.
Левандовски яна бир неча йил ўйнаши мумкинлигини ҳам тан олди.
Футболчи Ла Лиганинг жорий мавсумида 14 та баҳсда қатнашиб, 9 та гол урди ва 2 та голли узатмани амалга оширди. Унинг клуб билан шартномаси ёзгача амал қилади.
