Мюнхеннинг "Бавария" клуби 17 ёшли ярим ҳимоячиси Ленарт Карл мухлислар томонидан Мадриднинг "Реал" клуби ҳақида гапиргани учун танқид қилингач, ижтимоий тармоқдаги саҳифасида изоҳларни ўчириб қўйди.
Аввалроқ футболчи "Реал"да ўйнаш истагини билдирган ва "қаймоқранглилар"ни ўз орзусидаги клуб деб атаганди. Ярим ҳимоячининг таъкидлашича, "Бавария" унинг қалбидан чуқур жой олган ва унга Мюнхен клубида тўп тепиш ёқади.
Жорий мавсумда Ленарт Карл "Бавария"нинг асосий жамоасида дебют қилди. Клуб учун барча мусобақаларда 21 та ўйинда у олтита гол урди ва иккита голли узатмани амалга оширди. Transfermarkt портали маълумотига кўра, футболчининг трансфер нархи 60 млн еврони ташкил этади.
