Собиқ ҳужумчи Златан Ибраҳимович ўз услубига таъсир кўрсатган спортчилар ҳақида фикр билдирди. У Роналдони тарихдаги энг яхши футболчи деб атади.

«Мен учун Роналдо ҳамиша ва ҳар доим энг яхши ўйинчи бўлиб қолди. Кўплаб буюк футболчилар бор, лекин мен учун у биринчи рақам. Ўшанда ижтимоий тармоқлар йўқ эди. Мен кутубхонага бориб, видеолар излардим, яширинча унинг дриблинг ва ҳаракатларини кузатардим. Шу трюкларни ўрганишни хоҳлардим. Натижада Муҳаммад Али ва Роналдодан илҳомланиб, қандайдир йўл билан ўз услубимни яратдим.

Мен Муҳаммад Алини телевизордан, ўшанда қора-оқ экранда кўрар эдим. Унинг қандай гапиргани, қандай ҳаракат қилганига диққат қаратардим. У кибрли инсон эмас эди. Болалигимдаёқ унинг кимлигини билмоқчи бўлдим. Ўзимга айтдим: «Мен унга ўхшаш бўлмоқчиман, лекин футболда». Шундан сўнг ўйинларни кузата бошладим, шу пайтда биринчи марта Роналдони кўрдим», — деб ёзади Ибраҳимовичнинг сўзларини Sky Sport Italia.