Аввалроқ профессионал футбол клублари ўз тарбияланувчиларини Лига рўйхатидан ўтказиши шартлиги маълум қилинганди. Ассоциация ва Лига ўзаро келишган ҳолда клуб ва унинг мактаби масаласини тўла тартибга солади.

Клуб профессионал меҳнат шартномаларини Лига рўйхатидан ўтказиши учун саккиз ёш тоифасининг ҳар бирида энг камида 25 нафардан тарбияланувчига эга бўлиши лозим. Болалар футболини ривожлантириш лойиҳаси асосида Суперлига клублари MyLeague платформасига ўн ёш тоифаси бўйича (2007—2016) тарбияланувчиларини киритишни бошлади. Эндиликда Лига томонидан тасдиқланган ҳар бир тарбияланувчи профилида электрон футболчи паспорти ва унда футболчининг FIFA ID рақами акс этмоқда.

Ҳозирга қадар «Нефтчи» (183), «Қўқон-1912» (175 нафар), «ОКМК» (275), «Пахтакор» (254), «Бунёдкор» (241), «Насаф» (196) ва «Қизилқум» (161) клублари мазкур талабни бажаришда етакчилик қилмоқда. Қавс ичида Лига томонидан тасдиқланган тарбияланувчилар рўйхати кўрсатиб ўтилган. Улар ёш футболчиларни FIFA талаб қилган кўринишда рўйхатдан ўтказишда давом этмоқда. Шундан келиб чиқиб, юқоридаги рақамлар ошишда давом этади.

Эндиликда мазкур клублар 2026-йилги мавсум учун профессионал футболчиларни рўйхатдан ўтказиши мумкин. Қолган клублар эса бунинг учун фаоллашиши талаб этилади.

Айнан қайси ёш футболчи Лига рўйхатидан ўтказилганлигини e-pfl.uz ҳаволаси орқали текшириб олиш имконияти мавжуд. Бунинг учун ҳаваскор футболчилар бўлимига кириш ва футболчининг исм-шарифи ёки аниқ туғилган санаси орқали излаш кифоя.