Янги мавсум учун жиддий вазифалар сари курашишни кўзлаган «Андижон» шу ниятда таркибини кучайтириб бормоқда.

Айнан ушбу мақсадда таклиф қилинган футболчилардан бири Пўлатхўжа Холдорхонoв бўлиб, 22 ёшли ҳужумчи куни кеча жамоамиз билан шартнома имзолади ва иқтидорли ҳужумчи клуб матбуот хизмати саволларига жавоб қайтарди.

— Пўлатхўжа, сизни «Андижон» аъзосига айланганингиз билан муборакбод этаман. Шартнома имзоланди ва энди бу борада нималарни айта оласиз?

— «Андижон» жамоасини ва жонкуяр мухлисларини ҳурмат қиламан ва мен бу жамоа аъзоси бўлганимдан хурсандман.

— Ушбу вариантдан кўнглингиз тўлдими?

— Мен ҳар қандай чақирувга тайёр эдим. Лекин вариантлар орасида «Андижон» клуби менга кўпроқ ёқди. Сабаби — ашаддий мухлислар ва тажрибали мураббий.

— «Шўртан» сафида тўпурарлик маҳоратингизни кўрсата олдингиз. Янги мавсумда янада ўзгача иштиёқ сизда сезиляпти. Бу ҳақида нима дея оласиз?

— «Шўртан» жамоасига тез мослашиб кетдим ва мен у ерда ўзимни оптимал формамга чиқа олмадим. Энди-энди оптимал формамга чиқаётган пайтимда чемпионат тугаб қолди. «Андижон» катта жамоа ва бу ерда масъулият ҳам кўпроқ, айниқса, ишқибозлар олдида. Худо хоҳласа, тез мослашиб кетаман, деб ўйлайман. Сабаби бизда ҳали икки ой вақт бор ва барча билан бир-биримизни тезроқ тушуниб кетамиз, деб умид қиламан.

— Охирги марта «Пахтакор» билан чемпионликка эришгандингиз. Яна медалларни соғиндингизми?

— Албатта, мен ёшлигимда кўплаб мусобақаларда чемпионликни қўлга киритганман ва ёш бўлишимга қарамасдан Осиё чемпиони, Ўзбекистон чемпиони бўлиш насиб қилган. Худо хоҳласа, «Андижон»га ҳам чемпионликни ният қилиб келдим.

— «Андижон»даги ўзгаришларни кўриб турибсиз ва бу борадаги муносабатингиз бизга қизиқ…

— Бу жуда ҳам қувонарли ва менга фақат мотивация беряпти. Айниқса, 2026-йилни Андижон вилояти ҳокими айтганидек, Андижонда футбол йили қиламиз, деганлари ажойиб. Мухлислар ҳам йилдан-йилга кучайиб бораётганлиги мени қувонтиради.

— Ушбу таклифни танлашингизда сизга асосий туртки бўлган жиҳат нимадан иборат бўлди?

— Ушбу таклифни қабул қилишимга асосий турткилардан бири бу тажрибали мураббий ва чемпионликка бўлган интилиш. Шунингдек, албатта, «Ultras Burgut». Мен «Бобур арена»да уларнинг қўллаб-қувватлашларини сабрсизлик билан кутиб қоламан ва ўйлайманки, мухлисларни ва жамоани ўзимнинг голларим билан хурсанд қиламан. Олға «Андижон», олға «Ultras Burgut».