"Болтон" бош мураббийи Дуги Фридман клуб "Ливерпуль" яримҳимоячиси Жей Спиринг трансферини сотиб олишга қизиқаётгани ҳақида маълумот берди. Мураббийнинг бу ҳақдаги фикрларини The Liverpool Echo нашри чоп этган.
Эслатиб ўтамиз, 24 ёшли хавбек ўтган мавсумни "Болтон" таркибида ижара асосида ўтказган ва мавсум якунида "Ливерпуль"га қайтганди.
"Жей - жуда яхши ўйинчи. У ўтган мавсумда жамоадаги энг яхши футболчилардан бири бўлди. Ва айтиш мумкинки, уни ҳарид қилиш эҳтимолимиз йўқ эмас.
Бу ўтишнинг амалга ошиши учун қўлимиздан келган барча ишни амалга оширамиз. Агар трансфер шартлари талабларимизга жавоб берса, албатта биз унга бефарқ бўлмаймиз", деди Фридман.
Эслатиб ўтамиз, июль ўрталарида Спиринг Чемпионшипнинг бошқа бир клуби "Блэкберн"га ўтишдан бош тортганди. Ўшанда "Блэкберн" ўйинчи учун 1,5 фунт тўлашга тайёр бўлган ва "Ливерпуль" ҳам бунга рози бўлганди.
"Қизиллар" билан шартномаси 2014 йили якунига етадиган Спиринг ҳам Болтонга қайтишга қайтишга қарши эмаслигини айтмоқда. Эслатиб ўтамиз, у "Болтон"нинг мавсумдаги "энг яхши ўйинчиси" деб топилганди.
Ўйинчига, шунингдек, "Ньюкасл" ҳам қизиқаётгани борасида хабарлар бор.
