Футбол инсайдери Фабрицио Романо "Реал" раҳбарияти янги бош мураббий Альваро Арбелоага тўлиқ ишонишини маълум қилди.

Журналистнинг сўзларига кўра, яқин орада мадридликлар мураббийлар штабида ўзгаришлар бўлиши режалаштирилмаган. Янги мураббийнинг истиқболлари кеча Ла Лигада бўлиб ўтган ўйиндан сўнг, мухлислар футболчиларга ҳуштак чалиб, клуб президенти Флорентино Пересни истеъфога чиқишга чақирганидан сўнг фаол муҳокама қилина бошланди.

"Ҳа, мухлислар Флорентино Перес ва футболчилардан норози эди. Аммо "Реал"дагилар Альваро Арбелоани вазиятни ўзгартира оладиган одам деб ҳисобламоқда. Шундай экан, "Реал" мураббийни ўзгартиришни режалаштирмаяпти. "Реал" Альварога ишонади. Клубдагилар вазият мураккаблигини билишади. "Реал" учун бу ҳақиқатан ҳам оғир вазият. Уларнинг фикрича, "Альбасете"га қарши ўйин (2:3) жуда эрта, ҳатто яхши тайёргарликсиз ўтказилган. "Реал"даги манбаларга кўра, бу мағлубиятга Арбелоа жавобгар эмас," - деди Романо.

"Реал" кеча Испания чемпионатида "Леванте"ни 2:0 ҳисобида мағлуб этди. Мадридликлар Ла Лигада "Барселона"дан 1 очко ортда қолиб, 2-ўринда бормоқда, аммо каталонияликларда захира ўйини бор.