Futbol insayderi Fabrisio Romano "Real" rahbariyati yangi bosh murabbiy Alvaro Arbeloaga to‘liq ishonishini ma’lum qildi.

Jurnalistning so‘zlariga ko‘ra, yaqin orada madridliklar murabbiylar shtabida o‘zgarishlar bo‘lishi rejalashtirilmagan. Yangi murabbiyning istiqbollari kecha La Ligada bo‘lib o‘tgan o‘yindan so‘ng, muxlislar futbolchilarga hushtak chalib, klub prezidenti Florentino Peresni iste’foga chiqishga chaqirganidan so‘ng faol muhokama qilina boshlandi.

"Ha, muxlislar Florentino Peres va futbolchilardan norozi edi. Ammo "Real"dagilar Alvaro Arbeloani vaziyatni o‘zgartira oladigan odam deb hisoblamoqda. Shunday ekan, "Real" murabbiyni o‘zgartirishni rejalashtirmayapti. "Real" Alvaroga ishonadi. Klubdagilar vaziyat murakkabligini bilishadi. "Real" uchun bu haqiqatan ham og‘ir vaziyat. Ularning fikricha, "Albasete"ga qarshi o‘yin (2:3) juda erta, hatto yaxshi tayyorgarliksiz o‘tkazilgan. "Real"dagi manbalarga ko‘ra, bu mag‘lubiyatga Arbeloa javobgar emas," - dedi Romano.

"Real" kecha Ispaniya chempionatida "Levante"ni 2:0 hisobida mag‘lub etdi. Madridliklar La Ligada "Barselona"dan 1 ochko ortda qolib, 2-o‘rinda bormoqda, ammo kataloniyaliklarda zaxira o‘yini bor.