"Барселона" бош мураббийи Ханс-Дитер Флик Ла Лиганинг 20-турида "Реал Сосьедад"га қарши ўйинда (1:2) ҳакам ҳақида айтилган Френки де Йонг сўзларига муносабат билдирди.

Аввалроқ каталонияликлар ярим ҳимоячиси шундай деган эди:
"Хиль Мансано менга худди: «Мен сендан устунроқман», деб қараётгандек туюлди. У ўзини бундай тутмаслиги керак. Ямалнинг голи пайтида офсайдни кўрмадим".

Фликнинг сўзларига кўра:
"Унинг гапларига қўшиламан. Бунга вақт ва энергия сарфламоқчи эмасман.

Мен ҳакамдан хафа эмасман. Буларнинг барчасини ҳамма кўрди. Биз ўзимизга эътибор қаратяпмиз. Кўпроқ гол уришимиз керак эди, вазиятларимиз бор эди. Биз уйга очкосиз қайтяпмиз.

Ўйин олдидан ҳам ҳакам ҳақида фикрларни ўқиган эдим. Мен ҳар доим ҳакамлар ҳақида яхши фикр билдираман. Аммо Френки ҳақ. У хотиржам инсон, жамоа сардори. У майдонда, ҳакам билан гаплашмоқчи, лекин бунга имкон йўқ.

Баъзида мен ҳам тўртинчи ҳакам билан гаплашгим келади, аммо мумкин эмас, бунга кўникиш керак".

Ямалнинг офсайд сабабли бекор қилинган голи ҳақида Флик қуйидагича қўшимча қилди:

"Бу ўтган мавсумда Роберт Левандовскининг голини ҳам ҳисобга олмаган ўша ҳакам эмасми?"