Нидерландиянинг Вейк-ан-Зее шаҳрида шахмат бўйича 2026 йилги Tata Steel Chess турнири давом этмоқда. Ушбу нуфузли мусобақанинг умумий соврин жамғармаси 1,2 миллион АҚШ долларидан ортиқни ташкил этади.

Мусобақанинг Masters гуруҳи 5-тур баҳслари доирасида Жаҳон кубоги ғолиби Жавоҳир Синдоров оқ доналарда дунёнинг энг ёш тўртинчи гроссмейстери, туркиялик 14 ёшли Яғиз Каан Эрдоғмусни мағлуб этди. Ушбу натижадан сўнг Синдоров 3,5 очко билан турнир жадвалида 2-ўринга кўтарилди.

Синдоров 1-турда амалдаги жаҳон чемпиони, ҳиндистонлик Гукеш Доммаражу билан оқ доналарда, 2-турда нидерландиялик Аниш Гирига қарши қора доналарда, 3-турда словениялик Владимир Федосеев билан оқ доналарда дуранг қайд этган. 4-турда эса у қора доналарда германиялик Маттиас Блюбаум устидан ғалаба қозонган эди.

Ўзбекистоннинг биринчи рақамли гроссмейстери Нодирбек Абдусатторов эса 5-турда қора доналарда турнир пешқадами, АҚШ вакили Ҳанс Ниэманн билан дуранг ўйнади. Ушбу натижадан сўнг Абдусатторов ҳам 3,5 очко жамғариб, қўшимча кўрсаткичларга кўра турнир жадвалида 3-ўринни эгаллаб турибди.

Абдусатторов 1-турда қора доналарда туркиялик Яғиз Каан Эрдоғмус билан дуранг қайд этган бўлса, 2-турда ҳиндистонлик Праггнанандҳаа Рамешбабу устидан ғалаба қозонган. 3-турда яна бир Ҳиндистон вакили Аравиндҳ Читамбарам билан дуранг ўйнаган ва 4-турда оқ доналарда Чехия вакили Нгуен Таи Даи Ванни мағлуб этган.

Ҳозирда турнир жадвалида 3,5 очко билан қўшимча кўрсаткичларга кўра Ҳанс Ниманн етакчилик қилмоқда. 2-ўриндаги Жавоҳир Синдоров ҳисобида ҳам 3,5 очко мавжуд.

6-турда Нодирбек Абдусатторов амалдаги жаҳон чемпиони Гукеш Доммаражуга қарши, Жавоҳир Синдоров эса ҳиндистонлик гроссмейстер Аравиндҳ Читамбарамга қарши баҳс олиб боради. 6-тур баҳслари 23 январь куни ўтказилади.

Мусобақа 13 турдан иборат. Эслатиб ўтамиз, 21 ёшли Абдусатторов 2025 йилги Tata Steel Chess турнирида 3-ўринни эгаллаган эди.