Англиянинг “Манчестер Юнайтед” ҳамда “Манчестер Сити” клублари “Вест Ҳэм” сафида тўп сураётган 21 ёшли марказий ярим ҳимоячи Матеуш Фернандешга қизиқиш билдирмоқда. Бу ҳақда журналист Экрем Конур хабар берди.
Манбага кўра, португалиялик футболчининг шартномасида алоҳида банд мавжуд. Агар “Вест Ҳэм” Англия Премьер Лигасидан қуйи лигага тушиб кетса, бу банд фаоллашади ва футболчи жамоа билан шартномани муддатидан олдин бекор қилиш имконияти пайдо бўлади. Манчестер клублари эса айнан шу банд ортидан футболчини арзонроққа сотиб олиш ёки “Вест Ҳэм” мавсум якунида қуйи лигага тушиб кетса, бепул қўлга киритиш учун ҳаракат қилмоқда.
Айни пайда Лондон клуби АПЛ турнир жадвалида 17 очко билан 18-поғонани эгаллаб турибди. Клубнинг Чемпионшипга тушиб кетиш эҳтимоли жуда юқори. Шу сабабли “Вест Ҳэм” Фернандешни январь ойидаёқ сотиб, унинг трансферидан фойда қилиш имкониятини кўриб чиқиши тахмин қилинмоқда.
Маълумот учун, жорий мавсум Матеуш Фернандеш барча турнирлар доирасида 24 та ўйинда майдонга тушиб, ўз ҳисобига 3 та гол ва 3 та голли узатма ёздириб қўйган. Transfermarkt портали футболчининг бозор қийматини 32 миллион еврога баҳоламоқда.













