Март ойи охирида "Ливерпуль" ва Дортмунднинг "Боруссия" клублари афсоналар ўйинини ўтказади. "Қизиллар" матбуот хизматининг маълум қилишича, мерсисайдликларнинг собиқ ярим ҳимоячиси Стивен Жеррард бўлажак учрашувда иштирок этади.
Ўртоқлик учрашуви 28 март куни "Энфилд" стадионида бўлиб ўтади.
Жеррард "Ливерпуль" тарихидаги энг яхши футболчилардан бири ҳисобланади. Стивен 1997 йилдан 2015 йилгача Мерсисайд жамоаси шарафини ҳимоя қилган. Ярим ҳимоячи 2017 йилда футболчилик фаолиятини якунлаган.
Айни пайтда Жеррард мураббий ҳисобланади. Унинг сўнгги иш жойи Саудия Арабистони чемпионатининг "Ал-Иттифоқ" клуби бўлган.
