Бугун "Пахтакор" Косованинг "Приштина Ре" клубига қарши майдонга чиқди. 1:2 ҳисобида якунига етган ўйиндан кейин Санжар Қувватов кичик интервью берди.

"Йиғиндаги иккинчи ўйинни ўтказдик. Афсуски рақиб иккита ҳужум қилди, иккита гол урди. Иккинчисида қарши ҳужумдан фойдаланишди. Аслида биз бурчак зарбасини тепган эдик. Мавсум олди йиғинлардаги бу каби ўйинларда турли экспериментларни текшириб оламиз. Мана икки ўйиндирки асосий таркибда 11 нафар ёш футболчи тушяпти. Агар ҳозир биз дастлабки дақиқаларданоқ асосий таркиб билан ҳаракат қилсак бу каби ўйинларда ғалаба қозонамиз, аммо эртага захирамиз учун керак бўлган ёшларни ўйинсиз қолдирган бўламиз. Бу йил олдимизда катта бир мавсум турган пайтда, йиғинда кўпроқ асосий урғуни тажрибали футболчилар билан ёшларни қориштириб олишга қаратишимиз керак".

- "Пахтакор"нинг бугунги ҳолатидан келиб чиқадиган бўлсак, мавсумда мухлислар клубдан нима кутишса бўлади?

- Унутмайлик, бугун асосий таркибга кириши мумкин бўлган 5 нафар футболчи Ўзбекистон миллий терма жамоаси ихтиёрида. Бўриев, Ҳамралиев, Абжумажидов ва Турғунбоев каби асосий таркиб ўйинчилари жароҳатларни даволаш билан банд. Шунда ҳам бизда 22 нафар футболчи иккига бўлинган ҳолда ўйнай оляпти. Демак, бизда яхши жамоа бор ва 2026 йил ўзимиз иштирок этадиган барча мусобақаларда максимал натижани вазифа қилиб оламиз.