"Ливерпуль" марказий ҳимоячиси Виржил ван Дейк шартномаси якунига қадар жамоани тарк этиши даргумон. Сўнгги пайтларда "қизиллар" сардори ўйиндаги пасайиш учун танқид қилинмоқда, аммо клубда ҳали ҳам тажрибали нидерландияликка ишонч бор.

Football Insider хабарига кўра, "Ливерпуль" барча гап-сўзларга қарамай, 34 ёшли футболчи учун трансфер таклифларини кўриб чиқмайди.

Виржил ван Дейкнинг мерсисайдликлар билан шартномаси 2027 йилнинг ярмигача мўлжалланган бўлиб, унинг трансфер нархи Transfermarkt портали томонидан 18 млн еврога баҳоланмоқда. Жорий мавсумда футболчи Арне Слот жамоаси сафида барча мусобақаларда 32 та ўйин ўтказиб, ўз ҳисобига иккита гол ёздириб қўйди.