"Тоттенхэм" ҳужумчиси Рандаль Коло-Муани фаолиятини "Ювентус"да давом эттиришга тайёр.

Француз ўтган мавсумнинг иккинчи ярмида "кекса синора" шарафини ҳимоя қилганди, аммо туринликлар футболчини сотиб ололмади. Сентябрь ойи бошида Коло-Муанини "шпорлар" ижарага олганди, бироқ сўнгги вақтларда ОАВда ҳужумчининг Италияга қайтиши мумкинлиги ҳақида фаол гап-сўзлар юрибди. Журналист Маттео Мореттонинг ёзишича, "Ювентус" 27 ёшли футболчининг "Бьянконерилар"да яна ўйнаш истагига тўлиқ ишонмоқда. Қолаверса, агар "Тоттенхэм" келишувга тўсқинлик қилса, шахсан ўзи бу трансферни талаб қилиши мумкин.

Музокаралар Чемпионлар Лигаси умумий босқичининг сўнгги тур ўйинлари якунланганидан сўнг, пайшанба куни бўлиб ўтиши мумкин. Эслатиб ўтамиз, Transfermarkt портали 25 млн еврога баҳолаган Коло-Муани ҳамон "ПСЖ"га тегишли.