"Анжи" ҳужумчиси ва сардори Самуэль Это`O "Интер"га қайтиши ёки "Челси"га ўтиши мумкин, дея хабар бермоқда La Gazzetta dello Sport мухбири.
Милан клуби аллақачон "Анжи"дан 32 ёшли камерунликнинг сотилиш-сотилмаслиги ҳақида маълум сўраган бўлса, "Челси" ҳам айни шу йўналишда иш олиб бормоқда. Хусусан, Лондон клуби аллақачон расмий таклиф билан чиққани ва музокараларни бошлаб юборгани айтилмоқда.
Эслатиб ўтамиз, африкалик юлдуз "Анжи"га 21 миллион евро эвазига "Интер"дан келиб қўшилган. Унинг шартномаси уч йилга мўлжалланган бўлиб, айни пайтда йилига 20 миллион евро маош олади.
Хабарингиз бор, Это`о Махачқальа клубининг янги аъзоси Игорь Денисов билан чиқиша олмай қолган. Аввалроқ "Анжи" клуб ривожланиш стратегиясининг ўзгаргани ва баъзи юлдузларнинг трансферга қўйилишини маълум қилганди.
Кеча, шунингдек Самуэлга "Наполи" қизиқиб қолгани ҳақида ҳам хабар берилганди.
