"The Times"га берган интервьюсида "Куинз Парк Рейнжерс" бош мураббийи Харри Реднапп клубнинг "Тоттенхэм" ҳужумчиси Жеймейн Дефога қизиқаётгани тўғрисидаги хабарларни тасдиқлади. Шунингдек биринчи таклифга "шпорлар"дан рад жавобини олишганини ҳам маълум қилди.
Қайд этиш жоиз, Англия терма жамоасининг 30 ёшли ҳужумчиси "Тоттенхэм"да ҳафтасига 65 минг фунт маош олади. Лондонликларнинг "КПР" сотиб олмоқчи бўлган ва рад жавобини олган яна бир футболчиси - яримҳимоячи Скотт Паркернинг маоши ҳам таҳминан шундай.
Хабарларга қараганда, "Тоттенхэм" жамоанинг ўртача ёшини кичрайтириш ва маошларни камайтириш учун ёши катта ўйинчиларини сотиб юбормоқчи. Томонлар ўртасида музокаралар давом этмоқда.
