Сербиялик теннисчи Новак Жокович Australian Open турнири финалига йўл олди. Ярим финал баҳсида у мусобақанинг сўнгги икки карра чемпиони, италиялик Янник Синнерни мағлуб этди. Турнир Австралиянинг Мелбурн шаҳрида бўлиб ўтмоқда.

Учрашув беш сет давом этиб, 3:6, 6:3, 4:6, 6:4, 6:4 ҳисобида Жокович фойдасига якунланди. Мусобақада тўртинчи рақам остида таснифланган сербиялик теннисчи финалда Жаҳон рейтинги етакчиси, испаниялик Карлос Алкарасга қарши кортга чиқади. Ҳал қилувчи баҳс 1 февраль куни ўтказилади.

Бу Жокович учун Australian Open мусобақасидаги 11-финал бўлади. Эътиборлиси, сербиялик теннисчи ушбу турнирнинг бирорта финалида мағлубиятга учрамаган. Умуман олганда, у фаолияти давомида “Катта дубулға” турнирларида 38-марта финалга чиқди ва 24 та чемпионликни қўлга киритган. Ушбу кўрсаткичлар бўйича у эркаклар яккалик баҳсларида мутлақ рекордчи ҳисобланади. Жокович сўнгги бор Australian Open финалида 2023-йилда иштирок этиб, унда грециялик Стефанос Сиципасни мағлуб этган эди.

24 ёшли Янник Синнер эса ҳозирда ATP рейтингида 2-ўринда жойлашган. Италиялик теннисчи яккалик баҳсларида 24 та ATP турнирида ғалаба қозонган. У “Катта дубулға” турнирларида тўрт марта чемпион бўлган: Australian Open (2024, 2025), US Open (2024) ва Uimbildon (2025). Шунингдек, Синнер 2023 ва 2024-йилларда Италия терма жамоаси сафида Дэвис кубогини қўлга киритган.

Маълумот учун, Australian Open — мавсумдаги илк “Катта дубулға” турнири бўлиб, қаттиқ қопламали кортларда ўтказилади. Мусобақа 1 февраль куни якунланади, унинг умумий соврин жамғармаси 75 миллион долларни ташкил этади.