Лондоннинг "Арсенал" клуби бош мураббийи Микель Артета янги юлдуз Макс Доуман ҳақида фикр билдирди. Англиялик ҳужумкор ярим ҳимоячи 16 ёшга тўлмасиданоқ "канонирлар"нинг асосий таркибига кириб олганди. Ноябрь ойи охиридан бери вундеркинд жароҳати туфайли майдонга тушмаяпти.
"Шубҳасиз, Макс мен кўрган энг яхши ёш футболчилардан бири. Унинг қилаётган иши ўзига хос ва мен илгари ҳеч қачон бундай ҳолатга дуч келмаганман. Балки "Барселона"да фақат Месси шундай бўлгандир - у ҳам факт эмас. Доуманнинг характери ҳам кучли - у босимдан қўрқмайди, рақиблардан чўчимайди. Бу жуда қимматли фазилат. Биз унга ажойиб карьера қуришда ёрдам беришимиз керак", - дея Артетанинг сўзларини келтиради инглиз ОАВ.
"Арсенал" шанба куни Премьер-лига доирасида "Лидс"га қарши баҳс олиб боради.
