Мадриднинг "Реал" клуби бош мураббийи Альваро Арбелоа ҳужумчи Винисиус Жуниорнинг дисквалификацияси ҳақидаги саволга жавоб қайтарди.
Бразилиялик футболчи якшанба куни Ла Лига доирасида "Райо Вальекано"га қарши кечган баҳс (2:1) якунида сариқ карточка олди. Ҳужумчи огоҳлантиришлари кўпайиб кетгани туфайли бир ўйинга дисквалификация қилинди.
"Винисиус биз учун жуда муҳим, у фантастик гол урди. Биз учун у алоҳида хавф туғдирадиган ва ҳар доим рақибни яккама-якка вазиятда алдаб ўтиши мумкин бўлган футболчи. Бундай футболчининг борлиги рақибларга босимни оширмай қолмайди," - дея юлдуз футболчининг дисквалификациясига изоҳ берди Арбелоа.
"Реал"нинг "Валенсия" билан учрашуви 8 февраль куни бўлиб ўтади.
