«Барселона» раҳбари Жоан Лапорта Ла Лига доирасида яқинда бўлиб ўтган «Реал Мадрид» ва «Райо Вальекано» ўртасидаги ўйин ҳақида гапирди. Ўша баҳсда «қаймоқранглилар» Килиан Мбаппенинг 100-дақиқада пенальтидан урган голи эвазига ғалабани илиб кетишган эди (2:1).

«Мен «Реал»нинг «Райо»га қарши ўйинини кўрдим ва ўйинга қўшиб берилган ўн дақиқа қаердан келганини тушунмадим. Футболчилар борган сари кўпроқ симуляция ишлатишмоқда — бунинг учун уларни сариқ карточка билан жазолаш керак. Шунингдек, пенальтилар жуда осонлик билан белгиланмоқда деб ҳисоблайман. Улар ўзларига қарши қоидабузарликларни таҳлил қиладиган ва ҳакамлар томонидан кўрилган зарарлар ҳақида баёнот берадиган махсус телеканали бор клубга ёрдам беришмоқда», — дея Лапортанинг сўзларини келтирмоқда Marca.

Сешанба куни «Барселона» Испания Кубоги чорак финалида «Альбасете»ни мағлуб этди (2:1). Айнан ушбу жамоа аввалги босқичда «Реал»ни мусобақадан чиқариб юборган эди.