«Барселона» вингери Ламин Ямал ОАВнинг ортиқча эътиборидан ва Лионель Месси билан солиштирувлардан қочишга ҳаракат қилмоқда.
18 ёшли футболчини анчадан бери «янги Месси» деб атаб келишмоқда. Испаниялик футболчи ёш бўлишига қарамай, бу таърифга тўла мос келади, бироқ бундай гап-сўзлар «кўк-анорранглилар» аъзосини унчалик қувонтирмаётган кўринади. Diario Sport нашрининг маълумотларига кўра, Ямал март ойида Финалиссима доирасида Аргентина терма жамоасига қарши бўлиб ўтадиган ўйин олдидан матбуотдан узоқлашмоқчи. Вундеркинд Месси билан бўлажак учрашув ҳақидаги доимий саволлардан ва солиштирув мавзуси яна кўтарилишидан чарчаган.
Европа ва Жанубий Американинг амалдаги чемпионлари ўртасидаги баҳс 27 март куни (Қатардаги «Лусаил» стадионида) ўтказилиши режалаштирилган. Ушбу тўқнашувнинг асосий интригаларидан бири — Месси ва Ямалнинг майдондаги илк (ва эҳтимол, сўнгги) учрашуви бўлиши кутилмоқда.
