«Barselona» vingeri Lamin Yamal OAVning ortiqcha e’tiboridan va Lionel Messi bilan solishtiruvlardan qochishga harakat qilmoqda.
18 yoshli futbolchini anchadan beri «yangi Messi» deb atab kelishmoqda. Ispaniyalik futbolchi yosh bo‘lishiga qaramay, bu ta’rifga to‘la mos keladi, biroq bunday gap-so‘zlar «ko‘k-anorranglilar» a’zosini unchalik quvontirmayotgan ko‘rinadi. Diario Sport nashrining ma’lumotlariga ko‘ra, Yamal mart oyida Finalissima doirasida Argentina terma jamoasiga qarshi bo‘lib o‘tadigan o‘yin oldidan matbuotdan uzoqlashmoqchi. Vunderkind Messi bilan bo‘lajak uchrashuv haqidagi doimiy savollardan va solishtiruv mavzusi yana ko‘tarilishidan charchagan.
Yevropa va Janubiy Amerikaning amaldagi chempionlari o‘rtasidagi bahs 27 mart kuni (Qatardagi «Lusail» stadionida) o‘tkazilishi rejalashtirilgan. Ushbu to‘qnashuvning asosiy intrigalaridan biri — Messi va Yamalning maydondagi ilk (va ehtimol, so‘nggi) uchrashuvi bo‘lishi kutilmoqda.
