“Бунёдкор” – “Пахтакор” учрашувидан кейинги матбуот анжуманининг иккинчи қисмида “қалдирғочлар” устози иштирок этди.
- Тушунарсиз ҳолат, бунақа дерби ўйинларда рақибга бунақа “фора” бериш керак эмас. Тушунарсиз деётганимнинг сабаби, аввалги дербида “Локомотив” иккита гол урганди, кейин ҳисоб мувозанатини тенглаштиргандик. Бугун эса “Пахтакор” ўйин бошидаёқ ҳисобни очди. Айтмоқчиманки, учрашув бошларида гол ўтказиб юбориш одат бўлиб қоляпти. Пишур, Таран каби футболчилар бу каби марказий учрашувларда вазиятлардан унумли фойдаланиши керак эди. Иккинчи бўлимда яхши ўйнадик, аммо кеч бўлганди. Бир текисда ўйнай олмаяпмиз. “Пахтакор”ни ҳақли ғалаба билан табриклайман, - дейди Миржалол Қўшоқович.
- Бугун ёмғир ёғиб, майдон ҳолати сирпанчиқ эди. Таркиб танлашда бу жиҳатни ҳам инобатга олдингизми?
- Ҳозирги пайтда жамоамизда ёшларни асосий таркибга жалб қилиш сиёсати кечмоқда. Умуман қандай шароит бўлишидан қатъи назар футболчилар ҳужум ташкил этишга интилишяпти. Футболда ҳамма нарса бўлади – ҳатолар ҳам, ютуқлар ҳам бўлади.
- Терма жамоа бош мураббийи сифатида Жамшид Искандаров ва Игорь Сергеев ҳаракатларига қандай баҳо берасиз?
- Сергеев ҳар доимгидек фаол ўйнаб, ҳар бир тўпга интилиши билан ажралиб турди. Жамшид Искандаров ҳам аввалги ўйинлари каби тўпни ўзида кўпроқ сақлаб, кутилмаган паслари билан шерикларини қулай вазиятга чиқариб турди. Улар терма жамоа йиғинига таклиф этилганлар.
- Лутфулла Тўраев гол ургач, ҳеч бўлмаса дуранг натижадан умид қилдингизми?
- Ҳеч бир мураббий ҳакам хуштаги чалинмагунча хотиржам бўлмайди. Ҳатто йирик ҳисобда ғалаба қозонаётганда ҳам.
