Миланнинг «Интер» клуби президенти Жузеппе Маротта жамоа мухлисларига 23 мартга қадар меҳмондаги ўйинларга ташриф буюришни тақиқловчи қарорга муносабат билдирди.

Эслатиб ўтамиз, Италия чемпионатининг 23-туридан ўрин олган «Кремонезе»га қарши сафар ўйинида (2:0) «Интер» мухлисларидан бири майдонга петарда улоқтирган, у рақиб дарвозабони Эмиль Аудеронинг яқинида портлаган эди.

«Бу жуда жирканч ва салбий ҳаракат бўлиб, унинг биз ёшлар академияси ташкил этилган илк кунлардан бери тарғиб қилиб келаётган спорт қадриятларига ҳеч қандай алоқаси йўқ. Афсуски, баъзи одамлар — шунчаки жиноятчилардир. Клуб ўз манфаатларини ва тамоман бошқача қадриятларга эга бўлган асл мухлисларини ҳимоя қилиш мақсадида ушбу ишни тергов қилаётган суд органларига яқиндан ёрдам бермоқда», — деди Маротта Sport Mediaset нашрига берган интервьюсида.