Milanning «Inter» klubi prezidenti Juzeppe Marotta jamoa muxlislariga 23 martga qadar mehmondagi o‘yinlarga tashrif buyurishni taqiqlovchi qarorga munosabat bildirdi.
Eslatib o‘tamiz, Italiya chempionatining 23-turidan o‘rin olgan «Kremoneze»ga qarshi safar o‘yinida (2:0) «Inter» muxlislaridan biri maydonga petarda uloqtirgan, u raqib darvozaboni Emil Auderoning yaqinida portlagan edi.
«Bu juda jirkanch va salbiy harakat bo‘lib, uning biz yoshlar akademiyasi tashkil etilgan ilk kunlardan beri targ‘ib qilib kelayotgan sport qadriyatlariga hech qanday aloqasi yo‘q. Afsuski, ba’zi odamlar — shunchaki jinoyatchilardir. Klub o‘z manfaatlarini va tamoman boshqacha qadriyatlarga ega bo‘lgan asl muxlislarini himoya qilish maqsadida ushbu ishni tergov qilayotgan sud organlariga yaqindan yordam bermoqda», — dedi Marotta Sport Mediaset nashriga bergan intervyusida.
