Бугун Криштиану Роналду ўз туғилган кунини нишонламоқда. «Олтин тўп»нинг беш карра соҳиби 41 ёшга тўлди. Юлдуз португалияликни унинг собиқ клуби — Италиянинг «Ювентус» жамоаси табриклади.

«Туғилган кунинг билан, энг эзгу тилакларимиз сенга, Криштиану!» — дейилади «Ювентус» матбуот хизмати томонидан эълон қилинган табрикномада.

Маълумки, Криштиану Роналду 2018–2021 йилларда «Ювентус» шарафини ҳимоя қилган. Ушбу давр мобайнида форвард 134 та ўйинда майдонга тушиб, 101 та гол урди ва 28 та голли узатмани амалга оширди.

2023 йил бошидан бери Роналду «Ан-Наср» жамоасида тўп тепмоқда. Португалиялик футболчининг амалдаги шартномаси 2027 йилнинг ўрталарига қадар мўлжалланган.