«Ювентус» келаётган ёзда янги ҳужумчи сотиб олиш учун катта маблағ сарфлашга тайёр.
Шартномаси мавсум якунида ниҳоясига етадиган Душан Влахович катта эҳтимол билан «кекса синьора» сафини тарк этади. Tuttosport нашрининг хабарига кўра, туринликлар ҳамон «Галатасарой»да тўп сураётган Виктор Осимхенга қизиқиш билдирмоқда. Шунингдек, «бьянконери» раҳбарияти «Тоттенхэм»даги ижара муддати тугагач «ПСЖ»га қайтадиган Рандаль Коло-Муанини яна ўз томонига оғдиришга ҳаракат қилиб кўриши мумкин. Муқобил вариант сифатида эса шу қишда «Милан»га ўтишига бир бахя қолган «Кристал Пэлас» аъзоси Жан-Филипп Матета кўриб чиқилмоқда.
Transfermarkt портали Осимхеннинг нархини 75 млн евро, Коло-Муанини 25 млн евро, Матетани эса 40 млн еврога баҳоламоқда.













