Дортмунднинг "Боруссия" клуби Бундеслигада кетма-кет 14 та ўйиндан бери мағлубият нималигини билмаяпти — 10 та ғалаба ва 4 та дуранг.
Нико Ковач жамоаси 21-тур доирасида сафарда "Вольфсбург"ни 2:1 ҳисобида мағлуб этди. Дортмундликлар чемпионатда кетма-кет бешинчи ғалабасини қўлга киритишди. Уларнинг сўнгги мағлубияти 18 октябрь куни "Бавария"дан қабул қилиб олинган эди (1:2).
Ҳозирда "Боруссия" 48 очко жамғариб, Бундеслига турнир жадвалида иккинчи ўринни эгаллаб турибди. Битта захира ўйинига эга бўлган "Бавария"дан ортда қолиш — 3 очкони ташкил қилмоқда.
Навбатдаги турда "Боруссия" ўз майдонида "Майнц"ни қабул қилади. Ўйин 13 февраль куни бўлиб ўтади.
