"ПСЖ" клуби бош мураббий Луис Энрике билан шартномани узайтириш бўйича музокараларни бошлади. Клуб бу келишув муваффақиятли якунланишига ишонмоқда, бироқ испаниялик мутахассисга бошқа жамоалардан ҳам қизиқиш катта, деб хабар бермоқда L’Équipe.

Париж клуби испаниялик мураббий билан 2030 йилгача мўлжалланган янги шартнома имзолашни ният қилган. Раҳбарият шахсий суҳбатларда дастлабки музокаралар жуда хотиржам муҳитда ўтаётганини ва ҳаммаси белгиланган муддатда якунланишини тушунтирмоқда. "ПСЖ" мутасаддилари мураббий мавсум тугагунга қадар янги шартномага қўл қўйишидан умидвор.

Энрике Париж клубини 2023 йилнинг ёзида қабул қилиб олган эди. Унинг бошқаруви остида "ПСЖ" икки марта Франция чемпиони бўлди, икки мартадан Франция Кубоги ва мамлакат Суперкубогини қўлга киритди. Шунингдек, у 2024/2025 йилги мавсумда Чемпионлар Лигаси ҳамда Қитъалараро кубокда ғолибликка эришди.