Шанба куни Виктор Дьёкереш «Арсенал»нинг «Сандерленд»га қарши кечган ва 3:0 ҳисобида якунланган ўйини қаҳрамонига айланди ва дубль қайд этди.

Швециялик ҳужумчи 60-дақиқада захирадан майдонга тушган бўлса-да, «қора мушуклар» дарвозасини икки бор ишғол қилишга улгурди. Squawka нашрининг хабарига кўра, «тўпчилар» футболчисининг 2026 йил бошидан буён барча мусобақалардаги самарадорлик кўрсаткичи 8 тага (6 та гол ва 2 та ассист) етди — бу кўрсатилган давр мобайнида Премьер-лиганинг барча вакиллари орасидаги энг яхши натижадир. Иккинчи ўринни «Манчестер Юнайтед»дан Бруну Фернандеш, «Ливерпуль»дан Флориан Вирц ва «Челси»дан Энцо Фернандес бўлишиб турибди — уларнинг ҳисобида 7 тадан очко мавжуд.

Виктор Дьёкереш «Арсенал»даги дебют мавсумини ўтказмоқда. Ўтган йилнинг ёзида Лондон гранди ҳужумчини Лиссабоннинг «Спортинг» клубидан сотиб олган эди.