Италиянинг «Наполи» клуби сафида жорий мавсумнинг асосий қаҳрамонларидан бирига айланган Скотт Мактоминай Серия А доирасидаги «Женоа»га қарши навбатдаги ўйинда жароҳат олди. Биринчи бўлим якунида у захирага олинишини сўрашга мажбур бўлди. «Наполи» устози Антонио Конте вазиятга изоҳ берди.
«Скотт йил бошидан бери яллиғланиш туфайли муаммоларга дуч келмоқда, бу эса машғулотлардаги юкламаларни чеклашга мажбур қилади. У майдонда қолишни истаган эди, лекин мен эҳтиёт чорасини кўришга қарор қилдим», — дея неаполликлар мураббийининг сўзларини келтиради «calcionapoli1926.it».
Эслатиб ўтамиз, шотландиялик футболчи 2024 йилдан буён «Наполи» шарафини ҳимоя қилиб келмоқда. Клуб Серия А турнир жадвалида учинчи ўринни эгаллаб турибди.
