«Барселона» бош мураббийи Ханси Флик агар Виктор Фонт президент этиб сайланса, клубни тарк этиши мумкин.

Жамоанинг спорт тузилмасини белгилаш президентлик сайловларидаги асосий масалалардан бирига айланади. «Marca» нашрининг ёзишича, ким мураббий ва спорт директори бўлиши, шунингдек, номзод қандай трансферларни амалга ошириши ҳал қилувчи аҳамиятга эга.

Гарчи сайловлар ҳали расман эълон қилинмаган бўлса-да, Жоан Лапортанинг асосий рақиби Виктор Фонт аллақачон ўз ниятларини маълум қилган. Унинг сўзларига кўра, у Фликни қўллаб-қувватлайди, бироқ ҳозирги спорт директори Деку билан ишлашни истамайди.

Бундан сўнг немис мутахассиси Деку билан ишлашдан мамнун эканини ва улар ўртасида ўзаро ишонч шаклланганини таъкидлади.

2027 йилгача амал қиладиган шартнома мавжуд бўлса-да, агар Фонт президент этиб сайланса, Флик «Барса»да қолиш-қолмаслиги номаълумлигича қолмоқда. Энг эҳтимолий вариант сифатида, бундай ҳолатда мураббий шартномасининг қолган бир йилидан воз кечиб, клубдан кетиши тахмин қилинмоқда.