Бундеслиганинг 21-туридан ўрин олган «Бавария» ва «Хоффенхайм» жамоалари ўртасидаги учрашув якунланди. Мюнхенда кечган баҳсда мезбонлар 5:1 ҳисобида ишончли ғалабага эришишди.

Ўйин меҳмонлар учун омадсиз бошланди: 17-дақиқадаёқ Кевин Акпогума қизил карточка олиб, майдонни тарк этди. Орадан 3 дақиқа ўтиб, Гарри Кейн пенальтини аниқ амалга ошириб, ҳисобни очди. 35-дақиқада Андрей Крамарич «Хоффенхайм»нинг жавоб тўпини киритиб, мувозанатни тиклаган бўлса-да, Кейн 45-дақиқада яна пенальтидан гол уриб, дублини расмийлаштирди.

Биринчи бўлимга қўшиб берилган вақтда Луис Диас ўз шоусини бошлади. У 45+2, 62 ва 89-дақиқаларда гол уриб, хет-трик қайд этди ва жамоасининг йирик ғалабасини таъминлади.

Ушбу ғалабадан сўнг «Бавария» 54 очко билан Бундеслига турнир жадвалида якка пешқадамлик қилмоқда. «Хоффенхайм» эса 42 очко билан 3-ўринда қолди.