Анталияда йиғин ўтказаётган «Пахтакор» жамоаси 8 февраль куни иккинчи назорат учрашувини Молдованинг «Петрокуб» клубига қарши ўтказди. Учрашув жуда шиддатли ва воқеаларга бой тарзда кечди.

Беллашувнинг 7-дақиқасида ҳисоб очилди. Иброҳим Иброҳимовнинг аниқ узатмасидан кейин Ҳожимат Эркинов жарима майдони ичида тўпни назоратга олиб, чиройли зарба билан дарвозани ишғол қилди. 27-дақиқада эса Турғунбоевнинг пасидан кейин Иброҳимовнинг ўзи гол муаллифига айланиб, жамоамизнинг устунлигини оширди.

Биринчи бўлим давомида «Петрокуб» ҳам фаол ҳаракат қилди ва 33-дақиқада ҳисобни қисқартиришга муваффақ бўлди. Шу ҳисобда томонлар танаффусга йўл олишди.

Иккинчи бўлим бошида таркиб ўзгаришсиз қолди. 59-дақиқада мураббийлар штаби катта ротация қилди: майдонга бир қатор янги футболчилар туширилди ва фақат Дилшод Саитов ўйинни давом эттирди. 69-дақиқада рақиб яна бир бор дарвозага йўл топиб, ҳисобни тенглаштирди.

Шундан сўнг «Пахтакор» яна ташаббусни қўлга олди. 75-дақиқада тайинланган пенальтини Рустам Турдимуродов аниқ амалга ошириб, жамоани яна олдинга олиб чиқди. 80-дақиқада эса яна бир ёш дебютант — 2008 йилда туғилган Амирхон Муротов марказий ҳимоячи сифатида майдонга тушди.

Қолган дақиқаларда «Пахтакор» устунликни сақлаб қолди ва назорат учрашуви жамоамизнинг ғалабаси билан якунланди. Бу беллашув йиғин давомида таркиб ва ўйин вариантларини синаб кўриш учун муҳим тажриба вазифасини ўтади.

8 февраль, 2026 йил. Анталия.
"Пахтакор" - "Петрокуб" 3:2
Гол: Ҳожимат Эркинов (7), Иброҳим Иброҳимов (27), Рустам Турдимуродов (75).