Англия Премьер-лигасининг 25-тури доирасида «Манчестер Сити» сафарда «Ливерпуль»ни мағлуб этди. Учрашув 2:1 ҳисобида якунланди. Ғалаба тўпини қўшиб берилган вақтда пенальтини аниқ амалга оширган ҳужумчи Эрлинг Холанд киритди.

Ушбу гол норвегиялик тўпурар учун «Энфилд»даги биринчиси бўлди. «Ливерпуль»нинг уй стадионида гол уриш унга фақат тўртинчи уринишда насиб этди. «OptaJoe» нашрининг қайд этишича, Холанд Премьер-лигада ўзи ўйнаган 24 та стадиондан 23 тасида гол уришга улгурган. Ҳозирча у фақат «Сандерленд»нинг уй стадиони — «Стэдиум оф Лайт»да гол урмаган.

Жорий мавсумда 25 ёшли Холанд барча мусобақаларда 36 та ўйин ўтказиб, 28 та гол урди ва олтита голли узатма муаллифига айланди.

«Манчестер Сити» навбатдаги ўйинини 11 февраль куни «Фулхэм»га қарши ўтказади.