Миланнинг «Интер» клуби бош мураббийи Кристиан Киву А Сериядаги чемпионлик пойгаси ҳақидаги саволга жавоб берди.

Якшанба куни «нерадзуррилар» сафарда «Сассуоло»ни тор-мор этишди (5:0) ва иккинчи ўринда бораётган «Милан» билан орадаги фарқни саккиз очкогача етказишди. «Россонерилар» ихтиёрида битта захира ўйини мавжуд.

Учрашув якунлангач, журналистлар Кивудан соврин учун курашдаги имкониятлар ҳақида сўрашди — у эса анча ўзига хос тарзда жавоб қайтарди.

"Ҳозирги дақиқада — ноль фоиз. Олдинда ҳали ўйинлар кўп. Фақат бизгина катта мақсадларни қўяётганимиз йўқ. Олдинда оғир меҳнат кутмоқда", — деди руминиялик мутахассис DAZN телеканалига берган интервьюсида.

Келгуси шанба, 14 февраль куни, Италия чемпионатининг 25-тури доирасида «Интер» ўз майдонида «Ювентус»ни қабул қилади.