"Барселона" президенти Жоан Лапорта 15 март куни бўлиб ўтадиган клуб раҳбари сайлови ҳақида фикр билдирди.
Лапорта янги муддатга номзодини қўяди, унга Виктор Фонт, Хавер Вилахоана ва Марк Сирия рақиблик қилади.
"Биз Деку ва Ҳанс-Дитер Флик билан биргаликда санани танладик. Шунингдек, Ла Лига 15 март куни "Севилья"га қарши ўйин ўтказиш истагимиз борлигини маълум қилганмиз. Ягона муаммо - Чемпионлар Лигаси ўйини, агар у 18 мартга белгиланган бўлса, унда биз спорт манфаатларига устувор аҳамият берамиз.
Ишончим комилки, клуб аъзолари буни тушунишади, чунки улар жамоанинг ғалаба қозонишини хоҳлашади. Қандай бўлмасин, "Камп Ноу"дан ташқари, сайловда иштирок этишни рағбатлантириш учун бошқа сайлов участкалари ҳам бўлади.
Сайлов кампаниясига катта иштиёқ ва лойиҳамиз ҳақида сўзлаб бериш истаги билан ёндашаман. Бошлаган ишимизни охирига етказмоқчимиз", - деди Лапорта.
