«Реал» ҳимоячиси Даниэль Карвахаль ўйин амалиёти етишмаётганидан норози.

Кеча 34 ёшли футболчи Ла Лиганинг 23-тури доирасидаги «Валенсия»га қарши баҳсни (2:0) тўлиқ захира ўриндиғида ўтказди. Ўнг қанот ҳимояси позициясида асосий таркибда Давид Хименес Корредор майдонга тушди, 76-дақиқада эса уни Трент Александер-Арнолд алмаштирди.

Финал ҳуштагидан сўнг Карвахаль жисмоний тайёргарлик бўйича мураббий Антонио Пинтус қўл остида шуғулланиш учун майдонга тушди. «The Athletic» нашрининг ёзишича, футболчи жуда «ғазабланган» ҳолатда бўлган.

Ўйинчига яқин манбаларнинг таъкидлашича, у майдонга тушмаётганидан қаттиқ хафа, бироқ қаттиқ машқ қилишда давом этади.

«Реал» раҳбариятидаги манбалар эса клуб шу мавсум охирида муддати тугайдиган шартномани узайтириш борасида иккиланаётганини маълум қилишди. Карвахаль томони ҳам унинг «Мадрид»да қолишига ишончи комил эмас. Клубда аллақачон ўнг қанот ҳимояси учун эҳтимолий трансферлар муҳокама қилинган.

Испаниялик ҳимоячи Ла Лиганинг жорий мавсумида 7 та ўйинда иштирок этди.