Мюнхеннинг «Бавария» клуби ҳужумчиси Харри Кейн жамоанинг яқин келажаги борасида ўз фикрларини билдирди. Мюнхенликлар айни дамда 3 та турнирда ғолиблик учун кураш олиб бормоқда.
«Биз мавсумнинг ҳал қилувчи палласига кириб бораётганимизни биламиз. Иккинчи ўриндаги жамоадан яхшигина фарқ билан олдиндамиз, аммо ўтган ҳафта кўрганимиздек, бу фарқ тезда қисқариши мумкин», — дея Кейннинг сўзларини келтирмоқда клуб расмий сайти.
«Мавсум бошиданоқ асосий эътиборни февраль-март ойларигача таркибда жароҳатларсиз, юқори поғоналарда етиб келишга қаратган эдик. Биз ҳамон турнир жадвалида пешқадаммиз, Германия Кубоги учун курашяпмиз ва Чемпионлар Лигасининг чорак финалига йўл олдик. Бу биз учун ижобий ҳолат. Энди мавсум ҳақиқатдан ҳам бошланади. Биз қаттиқ ишлашда давом этишимиз ва бизни ким қувиб ета олишини кўришимиз керак», — деди Кейн.
«Бавария» ҳисобида 54 очко мавжуд. Дортмунднинг «Боруссия» клубида 48 очко бор. Кейн 24 та гол билан Бундеслига тўпурарлар пойгасида етакчилик қилмоқда.
