А Серия 24-турининг сўнгги ўйинида "Рома" "Кальяри" дарвозасига иккита тўп киритди - иккала голни ҳам январь ойидан бери "Рома"да ўйнаётган Дониэл Мален ўз ҳисобига ёзиб қўйди. Албатта, "Рома" устози Жан Пьеро Гасперини унинг ўйинидан жуда мамнун.
"Ишончим комил эди ва энди бу ишончни мустаҳкамладим - у бу чемпионатда кўплаб голлар уради. Биз уни тўплар билан яхши таъминлашимиз керак ва ҳаммаси яхши бўлади. Унинг хусусиятлари бизга жуда мос келади. Унинг имкониятлари катта. У жуда яхши", - дея Гасперинининг сўзларини келтиради forzaroma.info.
Ҳозирда "Рома" Италия чемпионати турнир жадвалида бешинчи ўринни эгаллаб турибди. Клуб охирги марта 2001 йилда мамлакат чемпиони бўлган.
