Ҳужумчи Криштиану Роналду "Ан-Наср" қароргоҳидан олинган суратни ижтимоий тармоқларга жойлаштирди.

Аввалроқ португалиялик футболчи Саудия Арабистони чемпионати доирасидаги "Ар-Риёд" ва "Ал-Иттиҳод"га қарши учрашувларни ўтказиб юборган эди. Хабарларга кўра, Роналду Саудия Арабистони Суверен жамғармаси (PIF) "Ан-Наср"ни рақобатчиларига нисбатан бошқариш усулидан норози бўлган ва клубга чемпионлик учун курашда тўсқинлик қилинмоқда деб ҳисоблаган. Шунингдек, у Карим Бенземанинг "Ал-Ҳилол"га ўтиши "рақобатга зарар етказиши" сабабли бу трансферга қарши чиққан эди.

9 февраль куни Роналду ўз бойкотини (иш ташлашини) тўхтатгани ҳақида маълумот пайдо бўлди — "Ан-Наср" ходимларнинг иш ҳақидан бўлган қарзларини тўлаб берган.

Бугун португалиялик юлдуз клуб қароргоҳидан сурат жойлаб, ўз постида "Ан-Наср"ни белгилаб ўтди.