«Челси» ярим ҳимоячиси Коул Палмер яна бир бор ўн бир метрлик жарима зарбасини аниқ амалга оширди.

23 ёшли футболчи бугунги 26-тур доирасидаги «Лидс»га қарши ўйиннинг 58-дақиқасида пенальтидан унумли фойдаланди. «Squawka» маълумотларига кўра, инглиз юлдузи Премьер-лигадаги 19 та пенальтидан 18 тасини голга айлантирган. Унинг ягона омадсиз уриниши ўтган йилнинг март ойига тўғри келади — ўшанда футболчи «Лестер» дарвозасини ишғол эта олмаган эди.

Эслатиб ўтамиз, «Вулверхэмптон»га қарши кечган аввалги учрашувда Коул Палмер хет-трик қайд этган бўлиб, учта голдан иккитасини пенальтидан киритганди. Ҳужумкор ярим ҳимоячи ҳисобида Англия чемпионатининг жорий мавсумида жами саккизта гол ва битта голли узатма мавжуд.