«Марсель» Роберто Де Дзербининг бош мураббий лавозимидан истеъфога чиқарилганини эълон қилди.

Таъкидланишича, ҳамкорлик томонларнинг ўзаро розилиги асосида тўхтатилган.

«Клуб раҳбариятидаги барча манфаатдор томонлар — эгаси, президенти, техник директори ва Де Дзерби билан ўтказилган музокаралардан сўнг, асосий жамоа мураббийини ўзгартиришга қарор қилинди. Бу мавсумнинг қолган қисмидаги вазифаларни бажариш йўлида, клуб манфаатларини кўзлаб, синчковлик билан кўриб чиқилган қийин жамоавий қарор бўлди. «Марсель» Де Дзербига содиқлиги, фидойилиги, профессионаллиги ва жиддий ёндашуви учун миннатдорчилик билдиради, бу айниқса жамоанинг 2024/25 йилги мавсумда [Лига 1да] иккинчи ўринни эгаллашида яққол намоён бўлган эди», — дейилади клуб баёнотида.

Франция чемпионатининг 21-туридан сўнг «Марсель» 4-ўринни эгаллаб турибди. Чемпионлар лигасининг умумий босқичида эса «олимпиячилар» 25-ўринни қайд этишди ва плей-оффга чиқа олишмади.